“কুড়িগ্রামের আঞ্চলিক ভাষায় রচিত”
কুড়িগ্রামের মানুষ হামরা
কাজ করিয়া খাই,
দুঃখ মেলা তাওতো হামার
সুখের অভাব নাই।
শোনো তোমরা দেশো বাসী
এই গরীবের গান,
কষ্ট করি খাইলেও হামার
কোমল মনো প্রাণ।
না থাকিলেও টাকা কড়ি
আছে হামার মন,
আনাচ কানাচ বাংলাদেশের
সবায় আপন জন।
জান জাহান ছাড়ি দিয়া
কাজ করি ভাই মাঠে,
সইন্ধা হইলে আড্ডা হামার
বন্দরে আর হাটে।
বাজার থাকি আইসলে বাড়ি
গরম ভাতের হাড়ি,
পাতে দিয়া আলু ভত্তা
আনে তাড়া তাড়ি।
খায়া দায়া নাক ডোডেয়া
ঘুমাই রাইতের ঘুম,
বিয়ান হইলে ফিরো হামার
কাজ করিবার ধুম।
এমন করি বাঁচি হামরা
চিন্তা ভাবনা নাই,
কুড়িগ্রামের মানুষ হামরা
কাজ করিয়া খাই।।
ছন্দঃ মাত্রাবৃত্ত
রচনাকালঃ ২২-১১-২০১৭ ইং
