হারা বছর লইন না খবর
আইন না এখদিন গাওত
ইলকশনোর সময় আইলে
আইয়া ধরইন ফাওত।
বাফ ডাখইন, চাচা ডাখইন
মৌয়া, হুফা, মামু
নানান জাতোর কুটুম বানাইন
আগে লাগইন না খামো।
নামাজ ফড়ইন না এক ওয়াক্ত
মাথাত লাগাইন টুফি
খথায় বার্তায় মনো অয় তন
তাইনউ বড় ছুফি।
ছলাম খরইন দূরই থাকি
মুখোর মাঝো আসি
খাছো আইয়া বুক মিলাই খইন
ভোট দিও ভাই থাসি।
ফাস খরলে খইন খততা খরবা
গাও টাউনোর লাগান
ফুল বানাইবা, কারেন্ট আনবা
মাটির রাস্তা ফাখান।
ইলকশনোর ফরে কিন্তু আর
তানোর দেখা নাই
কুন্তার এখন দরখার অইলে
তান ফাও ধরা চাই।
সাংগ ফাংগ লইয়া ছলইন
হখলতাও এখন তারা
ছাইর আনারো দাম নাই তখন
এম পি খরছইন যারা।