কই গেলেগো ও সকিনা কয়েল দে জ্বালাইয়া
কালা কালা মশায় আমার গত্তর গেল খাইয়া।
সখিনার মা কুবাই গেলায়
জলদি করি আও
কুরুঞ্জিরপাল মশায় আমার
গতরো বাইরা নাও।
ফুটি ফুটি রক্ত বারয় একবার দেখো চাইয়া
কালা কালা মশায় আমার গত্তর গেল খাইয়া।
হারাদিনে হেরান অইয়্যা
আইলাম বাড়িঘর
আমার লাগি সেবা করার
ফুরস্ত নাইনি তোর।
বনর মাঝর কেড়া মশা গান গায় উড়ি যাইয়া
কালা কালা মশা আমার গতর গেল খাইয়া।
মশার কামড়ে মরতায়নারে
বারৈতো নায় জান
আমরার কিতা শরিল নাইনি
খালি শরিল তান।
জানে বুঝি আরাম খুঁজৈন বৌর গেছে আইয়া
কালা কালা মশা আমার গতর গেল খাইয়া।
বালুচর কয় হুনছতনিরে
হুনছতনি তার মাত
জান খুয়ায়্যা রুজি করি
কারে খাওয়াই ভাত।
কাইল বিয়ানে যাইমু আমি বাড়িঘর ছাড়িয়া
কালা কালা মশায় আমার গত্তর গেল খাইয়া।