আমইস্যা হুন্নিমায় গাঙের জোয়ার ভাটার লা'ন আঁর মনঅ উথাল হাথাল করের
এই উতলা চান্দের রাইতে হিতির কতা হুনি হুনি আঁই আরঅ উতলা অইতাম
হিতি বাদে আঁর আর ক'ন আছে? রসের হিরিত জ'মি জ'মি বরফ আবার গ'লি যায়
গাঙের হায় আছিলো ম্যাচাঙ, কত রাইত জাগি জাগি গান গাইছি, স'ম কাডাইছি
অ'ন হেই দিন আর আইয়ে না! ঝই আইলে অ'ন আর ভিজিনা মনের খুশিয়ে
চিল্লাই মাতায় তুইলতাম গেরামের রাস্তা-ঘাট, বন-জঙ্গল,
দিঘির হানি ঘোলা অই গেলেঅ আন্ডা আছিলাম মাছের লা'ন
ঘর-বাই বসত-ভিডা হেই হো'ন হানি, ঘোল হানি মাছের লা'ন ঝুপ্পুর ঝুপ্পুর হা'ল-লাফ
জীবনের, জীয়নের কোন তাগদা আছিলো না জোয়ান মরদের লা'ন
কত রাইত আইয়ে কত মানুষ চোকে হঅয়!
হিতির মনে আঁই আর আঁর মনে হিতি বান্ধা আছিলো
জমিন আর আইলের মত! বালিশ আর ওসারের মত!
ঠোঙার ভিত্তে হ'ল আর মানি ব্যাগেত্তে চকচইক্কা ট্যাঁয়ার মত!
অ'ন হিতি গ'ন গ'ন করি আঁডি যায় আঁর বাডির সামনে দি
লগে জামাই আর হোলা-হাইন, হোনা-রুপার কত দামি দামি জিনিস গলায় আর আ'তে
হিতিয়ে আঁরে কইছিলো আঁই জঅন ন' ভুলি, হিতিত্তুন কে'অয় আলগা কইত্তো হাইত্তো ন'
ক'দিন ন' যাইতেই বে'ক কতা ভুলি হিতি অইলো সংসারী
আর আঁই রাস্তাত খা'বোই খা'বোই তামাশা দেইয়ের! দুনিয়া ব' কঠিন জিনিস
আঁইঅ কাডের হুতুল! মনে অয়, মাইনসে কতা দে' ন' রাইখবেল্লাই!
২৪/০৮/২০২০
০১ঃ১৭ রাত