অনর কথা হনো লাগায়
হনর কথা অনো,
ইতা মাইনষর লাগি বড়
কষ্ট লাগে মনো।
কেনে যেন ভাই করে ইতা
বুঝে না এক জরা,
দিন ফুরাইলে মাইনষর আতো
খাইবো যেন ভাই ধরা।
মাইনষর কথা বাদ উ দিলাও
আল্লার কথা ধরলে,
চিন্তা করি পাইনা রে কূল
অইব কিতা মরলে!
হকল গুনার শাস্তি তখন
পাইব গুরো গিয়া,
তখন কোনতায় দিত নায় কাম
কান্দলেও চিল্লাইয়া।
অতার লাগি অই যাও মনা
থাকতে সময় ভালা,
তাল লাগানি বড় বাদ কাম
হকল বায়দি জ্বালা।
মাইনষর কথা কইলাম আমি
বড় মুখখান ভরি,
আছেনি ই অভ্যাসখানতা
আমার চিন্তা করি।
থাকে যদি বদ অভ্যাসটা
নিলাম আমি শপথ,
তাল লাগানি দিলাম ছাড়ি
ধরতাম নায় আর ঔ পথ।
বিঃদ্রঃ- সিলেটের আঞ্চলিক ভাষায় রচিত, দেখি তো কে কে বুঝতে পারেন। যে যে শব্দ বুঝতে পারবেন না, আমাকে বলবেন, বুঝিয়ে দিব।