এই গীতি কবিতাটি সম্পূর্ণ সিলেটের আঞ্চলিক
বাসায় লিখে দিয়েছি,হয়তো অনেকের চোখে
কবিতাটির বানান ও শব্দ ভুল বুঝতে পারেন।
আঞ্চলিক শব্দ গ্রামারের সাথে মিলেনা।
----------------------
. চাম্পার বিয়া
----------
. মেন্দি দেও গো চাম্পার হাতে
খাইল চাম্পার বিয়া,
খাইল আইবা দামান বেটা
বইরাতি সকল লইয়া !
চাম্পার মাইঝি টিপে কান্দইন
চকির কোনায়া বইয়া,
কিলা দিতা মায়ার পুরি
পালকিতে গো তুলিয়া !
চাম্পার ভাবি অলইদ পিসইন
কাটের উপর বইয়া,
তান নননরে অলইদ দিবা
ইষ্টি কুটুম মিলিয়া !
চাম্পার বাপ পেরেশানি
বিয়ার খরছ লইয়া,
মসলাপাতি খরছ যতো
বাবুছিরে দিলা সমজাইয়া !
চাম্পার চাচা গরু আনইন
উঠানেতে ঠানিয়া,
গাত কুদইন মেছাব ডাখইন
গরু জবো করিলা !
চাম্পা ভাই অখন আইলা
রঙ্গীল কাগজ লইয়া,
পথর খান্দায় সুতা বান্দইন
রঙ্গীল কাগজ দিয়া !
দামান আইলা যোহরের অখতো
রাখছইন তানরে খাড়া,
শালা মিয়ার ছাত্তি উল্টা
ছালাম দিয়া গেলা !
খলাগাছের গেইট আছে
বান্দা আছে পিতা,
পিতা কাটিয়া যাইবায় দামান
দিবায় তুমি পাঁচ হাজার টেখা !
টেলা ডেক্ষা করিয়া অখন
দিলা দুই হাজার টেখা,
ছালাম দিয়া দামান অখন
আসনেতে বসলা !
খাওয়া দাওয়া শেষে অখন
দামান কইন্না মিলাইলা,
চাম্পার হাতে মিঠাই খাবাইন
দামান মিয়া হাসিঁলা !
ফুলের মালা গলায় পড়ে
দামান মিয়া পাসিলা,
দামান্দের দুলাভাই টেখা বাটইন
শালা-শলি দেখিয়া !
চাম্পা বেগম কান্দইন অখন
মাইঝি-মইঝির গলায় ধরিয়া,
বড় ভাইয়ে কোড়ও তুলে
দিলা পালকিত উঠাইয়া !
মেন্দি দেও গো চাম্পার হাতে
খাইল চাম্পার বিয়া,
খাইল আইবা দামান বেটা
বৈরাতী সকল লইয়া !
-----///----
মোঃ রোকন আহমেদ।
লণ্ডন থেকে।
০১ অগাস্ট ২০১৯ সাল।
