ইলেকশোন আইলে দেশে
গাও গেরাম সব পাড়ায়
নেতা নেত্রী কর্মী হখলোর
আনা গুনা বাড়ি যায়।
চাচী কিতা বালানিগো
দিন কাল কিলা যার?
দোয়া নিতাম আইছি চাচী
ইলেকশোনো খাড়া অইয়ার।
আতাইয়া দেও মাথাখান মোর
দোয়া খরিও আত তুলি
ভোটোর দিনো মার্কাটা মোর
যাইও না রেগো মাই ভুলি।
যেতা লাগে খইও বেটি
ভাতিজারে আগে ফাইবায়
খালি ভোটোর দিনখান
ভাতিজার মুখা ছাইবায়।
খান্দা খাটি খরিয়া লগে
মানুষর মন গলাইয়া
ইলেকশোনো জিতিয়া হেশে
যাইনগি খানো ফলাইয়া।
কোনো কিছুর দরখার অইলে
এখন তানোর বাড়িত যাও
সরকার দেয়া সায্য নিতেও
ধরতে লাগে তান ফাও।
দুই চাইর খতা খইতে ছাইলে
এখন তানোর সময় নাই
সেক্রেটারীয় খয় কিতা খইতা
আমার লগে খইন চাই।