ইলেকশোনর আইলে সময়
হারাদিন মাইক বাজে
মাইকোর যন্ত্রনায় কেউরর
মন বয় না কাম কাজে।
হারা দিন মাইকো হুনো
অমুক ভাইয়ের সালাম নিন
তাইন বড় ভালা মানুষ
তানোর মার্কায় ভোট দিন।
চরিত্র তান ফুলের মত
শান্তিকামি মানুষ তাইন
হাছামিছা লেন লাগাইয়া
নেতার নামে গান গাইন।
রাইত দিনোর খবর নাই
মাগনা খানি পাইয়া
দুইশ টেকা রুজ পালাইয়া
যাইত্রা গান গাইয়া।
ঘুষ খাইন না সুদ খাইন না
দুর্নীতিতে তাইন নাই
ইতার লাগি ইলেকশোনো
তানোর মার্কায় ভোট চাই।
খয়দিন পরে নেতায় দেখ
রাস্তা ঘাট দিতরা বাঁশ
ইতা নিয়া খেউ মাতিলে
সাংগ পাংগোয় দেইন টাশ।
হখলতাতউ কমিশন খাইন
উজাড় খরইন বন বাদাড়
তানরে কুনতাত যায় না পাওয়া
সবতা ছালাইন ভাই ব্রাদার।