আজব এই দুনিয়া এখন
অই গেলো যে তেরা।
একটার পরে আরকটা ঔ
লাগের খালি বেড়া।
হাচা মাতলে পাইন না ভালা,
মিচা মাতে পাইন।
মিচা মাতার মানুষরে
সবে ভালা গাইন।
একটার পরে আরকটা যে
লাগি রইছে তলে।
ইতা মাতলে কইন আবার
কিগুর কিতা জলে।
টেকা খাইয়া করইন বিচার
মুখ চিনিয়া মাতইন,
ইতা চাচাইন সব বেজালও
কান পাতিয়া থাকইন।
বিচার আচার না থাকলে
কেমনে কিতা অইবও।
টেকা রুজির পথে তারার
অনেক বেড়া রইবো।
লুকাই লুকাই কত চাচায়
তলে  তলে বাইন আটাইন
অতায় আবার সমাজ চালাইন
হাচা-মিচা ঘাটাইন।
হাচারে যে মিচা বানাইন,
মিচারে যে হাচা।
ইতা করিয়া খাইলে দরা
যারজির জান বাচাইন।
লাম্বা লাম্বা মাত হুনিয়া
ডর লাগি যায় জানও।
মাতর লাখান কাম অয়না,
তাবা দিতাম কানও।
জানে খয় ধইরা অতার
কমরও দিতাম লাত।
উস্টা মারি ভাঙতাম অতার
হাবী গোষ্টির দাঁত।
বেটাইন আবার যেমন তেমন
বেটিন ও কম নায়।
হাচা মিচাত তারা থাকইন 
সকল বায়দি চাইন।
অনর কথা হনও কইতে
পাইন বেশি ভালা ।
মাতর মাজে তারার মুখো
লাগত নায় আর তালা।
বেটাইন বেটিন মিলিয়া
যা আরম্ভ করইন,
তারা বুলে যে ভালা
পুতি খালি পড়ইন।
কিতা মাততাম ইতা লইয়া
আকল বাকল নাই,
আস্তাদিন ওই তারার ইতা
আমি বেইয়াকলে পাই।