(রংপুরি কবিতা)  
ওরে ভালবাসা
ক্যানে দ্যাকাচুলু আশা
ক্যানে দ্যাকাচুলু স্বপন,
ক্যানে মন ধরি
গেলু তুই মরি
মোকো দিলুনা ক্যান কাপন।
মোর আছে মনে
গেছিনো দুই-ঝনে
কালা পাহাড়ের দ্যাশোত,
দুইঝনের কতলা কথা
মনেত যে মোর গাথা
কি হয় হউক শ্যাষোত।
তাও মোক ছাড়ি
ও! নিদয়া নারী
উড়াল দিলু তুই কোটে,
যায়না তো ভুলা
সেই কথাগুলা
আইজো বুকোত জাগিয়া  ওটে।
পাহাড়ি নাল মাটি
হাত ধরিয়া হাটি
ঘুরচোনো গোটাল পাহাড়,
দিনটা হোউক বড়
দোয়া য়্যাকনা করো
প্যাটোত নাইতা নাই আহার।
সউক গুলা ভুলি
যাবুই- যদি চলি
ক্যানে খ্যালালু প্রেম খেলা,
এ্যালাও মনোত ভাসে
এই বুঝি আসে আসে
জেবনে কি করিম মুই এ্যালা।
ক্যানেবা কিসে  টানে
এ্যালাও তার পানে
চায়া থাকোং যে খাড়াহয়া,
স্বর্গোত আচে নুকি
থাকুক অয়  সুখী
খোদা তুই অকে করোদয়া।


ইং- ২৪/১১/২০১৯ খ্রিঃ