এমন এখ যুগ আইলোরে ভাই
হখল দেখি আদুনিক
মা বাফর দেয়া নাম ফাল্টিয়ে
নিতরা হখলে নানান নিক।
আব্দুর রহমান নাম আছিলো
বদলাই রাখছইন পিন্টু খান
হাফপ্যান্ট আর গেঞ্জি ফিন্দিয়া
খরিয়া আটইন বুকটান।
খালি খালি মানষর নাম নায়
ডাখ ফাল্টিছে হখলতার
চখুর চশমা গ্লাস অইগেছে
বুড়া হখলর বুঝা ভার।
আইসক্রিমটারেও গ্লাস ডাখইন
ফানি খাওয়ার গ্লাস খই?
খালামনি অইছইন খালা
আগে আছলা ফরানোর মই।
মামু এখন আংকুল অইছইন
হুফা মওয়া মামাতে
ডাখা ডাখির সব ফাল্টিছে
কিছুই নাই ঠিক যায়গাতে।
মায়ের ভাই মামু আছলা
মামা ডাখাত দুষ নাই
ফুফা, খালুরে মামা ডাখইন
হুনিয়া মনো হাসি পাই।
ফুফা খালু শব্দহখল
বইয়ের মাঝেও আছে ত
তবুও হখলে কিতার লাগি
মামা ডাখইন বুঝি না ত।
মায়ের ভাই ই শুধু মামা
ফুফুর জামাই অইন ফুফা
খালার জামাই অইবা খালু
অন্যতায় লাগবো কুফা।
দুলাভাই ডাখ বইন জামাইরে
না বড় ভাই না ছোট
অতি আধুনিক অইতায় খরি
আসল ডাখখান না লুঠো।