ইউরোপ থাকি যাইয়া ফুয়ায় সুন্দরী বউ তুকায়
টেখার জোরে ফায়ত্রিশ ছল্লিশ বয়স দেখ লুকায়।
খইন্না তুকায় লম্বা,ফর্সা, বয়স ষোলোর নিচে
তার বয়সর ধার ধারে না মাইনষে যা খউক ফিছে।
চরিত্রখান কিলা ফুড়ির আমল খাইছলত কিতা
ধলা চামড়া দেখলে ফুয়ায় তুকায় না আর হিতা।
বিয়া খরিয়া বউরে লইয়া নারিং বিরিং খরে
খয়দিন পরে জানে ফুড়ির মনটা অন্যর ঘরে।
ফুড়ির বাফ, ভাই বেরাদর তাইন তাইনো যে কিলা
ফাইলে নশা ইউরোপর খইন জলদি খরি দিলা।
কিতা খরে ফুয়ায় হিনো স্বভাব কিলান কিতা
লোভে পড়ি অনেকেউ আর তুকাইন না আর ইতা।
হখল কিন্তু ইলান নায় ভাই মান ইজ্জত আছে
হুনিয়াও বিয়া দেইন না ফুড়ি যেইন তাইনোর খাছে।
আবার অনেক ফুয়াইন আছইন তারাও কিন্তু বালা
যেছাখানো খরি বিয়া জীবন খরইন না কালা।
দেখি হুনি যারাও রেরা বিয়া শাদী খরইন
সুখ শান্তিতে সংসার চালাই তারাও শুধু মরইন।
দেশী কিবা বিদেশী অউক্কা দেখি বিয়া খরো
আমল খাইছলত দেখি সবে ফুয়াইন ফুড়িন ধরো।