ভোটারর খদর বাড়ি যায়
ইলেকশোন আইলে
আইঞ্জা খরি বুকুত হারাইন
নেতা হখলে পাইলে।
বাড়ির হখল ভালা নি
কিলা যার দিন খাল
হুনলাম চাচা বেমার আছইন
গততর ফুলি অইছে লাল?
নেতায় জিগাইন চাচার খতা
চাচায় মরছইন গতবার
অত দিন ফর আইয়া নেতায়
খবর নিতরা ই বার।
মরার খতা হুনিয়া এখন
আফছুছ খরইন বুক থাপড়াই
ইতা বেলকি মায়ায় নায়
ভোট যে এখন একটা নাই।
জিগা ফুছার শেষ অই গেলে
পকেট থাকি কিছু দেইন
চাচির লাগি কিচ্ছু লইও
চোখ মুছিয়া নেতায় খইন।
বেমার আজার হুনলে খারো
হখলোর আগে নেতা আইন
ভোটর ফরে আর দেখা নাই
ভোটো জিতিয়া যেমনে যাইন।
দরকার অইলে ভোটর ফরে
পাতি নেতার ফাও ধর
ফাইলে পথো পাতি নেতারে
তানরেও এখন ছলাম খর।