আম্বিয়ার বাপ,
মুই গেনু সেলা
ঘর-দুয়ার ভোন থাকিল খোলা,
দেখি শুনি থন।
ভোক যুগুল নাগে তোমাক,
মরিয়মের মাক যেয়া কন।
কয়টা দিন খোয়ার কঁসু,
চাউল,ডাইল,তোকাই পাতি,
তামানে মুই দিয়া থুসু।
বাহের হাতে কাম করি,
সাকাল সুকাল আইসেন বাড়ি।
টেনশন তোমার যতোয় ভাসুক,
এংনা কম করি খান বিড়ি।
বাহের যুগুল যান সইনজা বেলা,
গরুর ঘরটাত দেন তালা।
কইতর, মুরগী দেখি থন,
হাপা আসি ধরিবে নাতন।
নাল খটুয়া খানোত মিঠাই থুসু,
হাঁড়িত থুসু খই।
অন্দনঘরের শিকিয়াত ভোন-
টাংগি থুসু দই।
কলসিত আসে মজা গুয়া,
বাটাত আসে পান।
মন যুগুল চায় তোমার,
নিকলি হানে খান।