মনোক বুজাং কি দিয়া
পুষ মাসিয়া শীতোত মন মোর ওটে
কান্দিয়া,,,,,,।
যেদিন থাকি মুই ছারচুং বাড়ী
কায়বা শোনে মোর মনের আহাজারী,
কামাই করি খাবার নাগবে
সেই আসাতে মনোক মুই থুচুং বান্দিয়া,
পুষ মাসিয়া শীতোত মন মোর ওটে
কান্দিয়া,,,,,,।
আইতোত বিছনাত শোতোং এ্যকলা
ছ্যংছ্যংগা হয়া থাকে দ্যাগলা,
পষাণ জারোত থাকিয়া থাকিয়া
নিন মোর যায় যে ভাঙ্গিয়া,
পুষ মাসিয়া শীতোত মন মোর ওটে
কান্দিয়া,,,,,,।
ময়নার মাও যদি পাশোত থাকিল হয়
উশুমে নিন মুই পারনুং হয়,
বিয়ানা উটি গরম ভাত মোক
খাওয়াল হয় আন্দিয়া,
পুষ মাসিয়া শীতোত মন মোর ওটে
কান্দিয়া,,,,,,।
১৬/১২/২০১৮ খ্রিঃ।
    --------  |  -------